Vargu i ditës: "Ju do të merrni fuqi kur Fryma e Shenjtë do të vijë mbi ju dhe do të bëheni dëshmitarët e mi në Jeruzalem dhe në gjithë Judenë, në Samari dhe deri në skajin e dheut." Veprat 1:8
E ke parasysh kur ke parë diçka dhe ke shumë dëshirë ta ndash me të tjerët? Është diçka shumë e veçantë që edhe pse e ke në telefon të regjistruar, prapë seç të gërric nga brenda dhe do patjetër ta ndash me dikë...
Po ai momenti kur ke parë diçka me sytë e tu dhe je dëshmitar okular i asaj që ka ndodhur dhe fillon ta përshkruash me shumë detaje... Por nuk është e njëjta gjë kur vjen puna që duhet të dëshmosh për diçka ku rrezikohesh... Por kur ke siguri, pse jo, mund të dëshmosh për çdo gjë...
Dikush ka thënë: "Lëre Zotin të jetë Gjykatësi. Puna jote është të dëshmosh për Atë!"
Pasi të pajisesh me Frymën e Shenjtë ti do të dëshmosh për Jezusin me këdo, kudo dhe në ç'do kohë. Mesazhi dhe historia e Jezusit ka vazhduar tashmë për mijëra vjet dhe ne jemi dëshmitarë të mrekullive që kanë ndodhur me jetën e shumë njerëzve... Shohim si ka ndryshuar dhe dëshmojmë fuqinë e Perëndisë në jetët tona dhe vazhdojmë me të njëjtën dëshmi që kanë parë dishepujt e hershëm... Jezusi vdiq në kryq dhe u ringjall të tretën ditë sipas Shkrimeve dhe më pas Ai u largua drejt Atit... Njerëzit e panë këtë, dëshmuan dhe ne vazhdojmë të dëshmojmë Lajmin e Mirë...
Pëshpërit Një Lutje
At’, faleminderit që kemi privilegjin dhe nderin të jemi pjesë e mbretërisë Tënde. Jezus faleminderit për sakrificën tënde dhe që mund të dëshmojmë lajmin e mirë dhe të vazhdojmë ta ndajmë atë. Faleminderit që ndryshove jetën time... Unë do të jetoj për ty Zot... Lutem në emrin tënd të Shenjtë Jezus, Amen.